成績表
望住一張發出微黃成績表勾起了一段回憶.... 小學雞既時候考試我從來唔怕，最怕係要溫書！對於一個會發書瘟既人只會考試前一日應酬式溫書，如果早多過一日溫書直情覺得贏左全個世界！望住本書又望下個電視期待有神仙打救，打救冷冰冰電視等佢可以發熱發亮！ 兩手fing fing返到學校望住一班勤力溫書黨，再望望自己雙手未免太得閒唯有死死氣攞出道具做黨員！ 從來係精英班中我都係車邊客，成績會係點心中有數，但求合格過關就算贏，高分就係中大獎！ 身處係槍林彈雨既班房中考試名次比一切重要。成王敗寇，考第一得天下，考第尾比人鄙！還記得有一次派成績表，當一位男同學路經我坐位時拋下一句令我畢身難忘既說話，＂唔洗怕！第尾我同你地頂左！＂嘩嘩嘩！不得了！小學雞就已經有捨己為人精神，全體包尾4名要向你致敬！ 多年來對於成績表上既評語都好糾結，班主任係咪完全了解全班每個學生而寫下評語，定係有10 set句子交叉式輪流使用？為左查證此事唯有窺探其他同學成績表，同學們就如遇臨大敵馬上合上成績表再用鋭利既眼神刺向我，無言！ 被眼神徹底打敗後從此不敢挑戰同學們底線，好奇心係要付上代價！好吧！就令此事成為永遠不解之＜謎＞
