無聊雜碎

鄉下對於我黎講係一個極陌生又無親切感地方, 除左由細到大填資料時要填上恩平呢個地方外我從未真實踏足過此地! 細個時仲有一個渠道接觸到關於鄉下既事就係見嫲嫲屋企成日有大袋細袋既衫佢儲夠數就會寄返鄉下, 佢話鄉下既人窮冬天無厚衫著好可憐所以佢想做得幾多得幾多! 近日係家族群whatsapp收到叔叔send黎既族譜, 雖然族譜上無我名(叔叔堅持只有男丁名, 但係我見到人地有填女名) 但係有我細佬同各堂細佬個名突然同鄉下有連繫親切感好似豹突湶咁湧住出, 原來我地呢一代已經係二十八代. 係頁內有備註欄會寫上邊個係邊間大學畢業, 邊個係香港做咩政府高職位.....點鳩解無我名喎如果我有份老虎蟹輸人唔輸陣我一定填上"自我認為著名設計師"! 哈哈....唔知醜呢方面我永遠守住第一名! 人生第一次見到族譜 族譜第一頁, 備註中有講解甄姓來源

老友介紹今期 e-zone隨書附買補光燈, 同老細食完lunch嗱嗱聲撲去7仔買放低$59飛撲上公司開波試燈!!  黃黑packing非常醒目, 可惜咁細粒野咁Q大個盒, 內有補光燈一粒及USB叉電線一條 老細初頭見到又話我買無鳩胃野不過佢一見到亮燈儀式後即時改口話好撚掂! 16頭黃白色LED燈絕唔係講玩笑只係開L已經光到刺眼! 有L M H 三段光度調較. 將補光燈插係電話headphone旋轉角度, 個人認為及測試後如果自拍時由於距離太近就算加埋牛油紙係燈前一樣影到一面油, 所以要自拍用最好用埋神棍. 測試環境柔和黃光下, 由於將補光燈插係電話影光度太強所以我最終左手揸補光燈右手揸電話影. 用左補光燈既相確實出現返正常顏色, 無偏黃偏白同出現死色, 掂呀!

我既朋友一號好鬼正不定時整好野比我地食, 涼茶 糖水 甜品 壽司 焗飯......可能佢知我懶所以好多時除左即場食仲有外賣服務, 其實係白堊紀時期我都曾經活躍過煮壇仲要係一煮不可收拾, 不過自從多野做到嘔白泡之後我就退隱煮壇為左表明決心我將最心愛既整蛋糕工具轉移到朋友一號屋企, 無眼屎乾淨盲!  朋友一號---自家壽司係我頭號最愛 朋友一號---芒果乳酪蛋糕 當年買左焗爐之後就日日開火而家就.......以下既甜品就係朋友食完之後不停encore既作品! 呢款改良版New York Cheese Cake幾乎一個星期就要整一個送比朋友食 唔係自讚個皮的確好鬆化! 西米布甸只係整過一次咩味道已經唔記得lu 有一年媽咪生日佢想要我親手整既蛋糕, 但又要岩佢口味最終整左個大鮮果撻, 我仍然記得佢開心滿足既臉容 每次整牛油曲奇我妹妹就會圓晒眼坐定定等食, 因為佢偷食過一次知道係好野所以佢必定chok樣chok到得手為止 都話牛油皮好正架啦整蛋撻又得整鮮果 撻亦得,得左! 呢幾個muffin唔食得都睇得:P 老實呢個雲石芝士蛋糕送比朋友一號, 我又無試過味唔知咩環境好彩朋友一號話掂! 第一次去學整蛋糕, 最難切芒果片整芒果花

前幾日認真比雨天玩撚死!  Day1 由公司出發原本只係陰天無雨當行到無瓦遮頭就開始落狗屎沿路仲要無地方避雨, 咁樣都未算推我去絕處仆你個街企係邪惡十字路口等一世都唔識轉綠色既燈位等過馬路時橫風橫雨有遮都無鳩用雨係從四方八面攻入, 係呢個時候我把有自動斷臂功能血滴子遮唔知係咪聽到我心聲話佢無鳩用, 佢竟然斷臂級住左我個頭! 大佬呀呢個時候先黎發爛渣, 好辛苦伸返直把遮再斜望企係我隔離個男仔我見到佢忍笑....雖然呢個情況瘀到叫但其實我自己都好想笑! 千辛萬苦行到去避雨我對夏娃池變水池都算但竟然開紿細雨, 唔通連雨雲都追殺我! 自動斷臂血滴子遮 濕鳩晒 Day 2 經過尋日一役我有所防範著上一對可抵擋風吹打既鞋, 但......竟然一滴雨都無接觸過 Day 3 由於我見尋日無領野再次疏於防範, 著左另一對唔防水既鞋結果係點...咪就係隻鞋濕到爛左條帶要拖住隻腳返屋企!!! 由於隻鞋已死無謂再影遺照費事越睇越傷心~~~~~~~~ Day 5 點解一跳到day5? 因為day 4著呢對都無事囉, 不過咁世事無絕對只有骨都脆! 放工既時候細細雨(雖然下晝係紅雨)唸住點都順利過渡, 企係燈位等過馬路就係呢個moment有個當自己揸林寶既巴士佬用極速鳩沖埋黎我望一望地下幾個大水dum心知不妙, 說遲時那時快我嗱嗱聲邊屌邊用把遮擋住前面既污糟水, 但係我只保得住我上半身下半身係全濕對鞋係盡濕! 其實我未算慘路邊執緊紙皮婆婆岩岩彎低身執緊野佢比污糟水由頭淋到腳, 呢條冚家祥巴士佬擺明玩野正仆街!

本身我好少刻意買甜品食不過每次經過Paul Lafayet都比佢個土陶兜吸引住當然甜品賣相亦係吸引到我啦, 幾個月前好似食佢個人氣甜品 Creme Brulee跟住再續一食其他有兜既甜品....$45蚊一個甜品有人可能覺得貴唔值但係平時係大眾化餅店買件靚靚地西餅都要十幾二十蚊, 係十二蚊店買個兜都要十二蚊啦...女人就係咁架啦將買野合理化首先要說服左自己先亦都要學丁蟹咁歪理當真理! Apple & Red Fruits Crumble 面頭個層口感似菠蘿包裡面充滿肉桂味蘋果肉,藍 莓 ,紅 莓,士多啤梨, 熱食比凍食好食 Blueberry Cheesecake & Chocolate Mousse 無物特別不過不失 Creme Brulee 面頭薄 焦糖脆脆的內裡燉蛋 雲尼嗱籽 充滿 雲尼嗱味 唔好以為個兜係洗乾淨其實係我lam 乾淨 Raspberry & Lemon Tart 呢個係我唯一一個食過無兜既甜品,淡淡檸檬味感覺清新

我既眼淚賤過地底泥話咁易就交晒出黎, 所以所有會令人喊既戲我都盡量唔入戲院睇費事喊溶個妝樣衰衰咁離開戲院! 就算係屋企睇碟我都要選擇心情大好日子先睇喊戲咪盞越喊越傷心.  星期日係屋企無所事事終於攞隻叮噹stand by me睇, 不負眾望睇叮噹喊3鑊!!其實喊得咁利害都有幾個因素既 1)可能明知道以後都唔會聽到保全叔幫叮噹配音 2) 見到叮噹離開突然令我唸起妹妹既離開 3) 我真係覺得好感人呀..... 不過傷心還傷心竟然見到夢熊大師大師深情演出簡直驚喜中既驚喜! 又令我唸起觸住妹妹隻手仔既時候 淨係呢一幕已經喊到her her聲, 仆佢個街個淚制好似壞鳩左咁! 登登登登!夢熊大師至理名言! 注: 夢熊大師圖為設計對白 技安你都有今日....哈哈哈..笑到胃反!

介紹返佢叫檬檬係我公司棟大廈既親善大使除非係怕狗否則一定會愛上佢! 每次見到檬檬佢都用佢條大脷幫我洗面+濕吻, 老細覺得我好痴線隻狗唔係你養都夠膽比佢鍚, 鍾意動物既野你識條鏈咩!  留意0:11 檬檬完美示範如何有禮貌吠叫!

介紹返如果你未聽過千祈咪撚聽, 聽左之後日loop夜loop唔好怪我無提醒! Mark Ronson & Bruno Mars Perform 'Uptown Funk' EPIK HIGH - '헤픈엔딩(HAPPEN ENDING) (feat. LEE HI)

早幾日個天灰過灰燼本來打算企係同一位置影返張相同晴天時對照, 唔知係發軟蹄定係風太強吹到我連退幾步當一舉電話影相之際眼前既畫面令腦內突然響起柏豪bb Imperfect #從好處著眼即使陰天變作好天#其實陰天又有咩好怕, 最多咪落狗屎吹到頭髮癲, 雨水整濕對鞋彈污糟條褲, 啲人把遮篤篤貢, 個人情緒低落啲! 我係UFO撚最愛投頭望天睇下有無料到

細個既時候媽咪幾無錢都好都盡量將最好既野比我同細佬, 係茶餐廳我同細佬一人一份早餐而佢自己食一份多士或者等我地食唔晒佢執我地口水尾, 自己又會死慳死抵等我地考試有好成績買禮物獎我地!  媽咪對於買禮物有種堅持不買無無謂謂不買毛公仔, 基本上可選既範圍係 A) Lego B) Puzzle C) 書 D) 電子琴 (留意返我係唔識彈琴,識彈既係媽咪) E) 以上皆非,如果係選擇時候發爛渣毛都唔洗旨意有! 起初我都好抗拒呢幾款野點解個個有Barbie有公仔玩係我無得玩! 後來玩玩下好似上左癮咁一盒Lego同Puzzle我可以砌完再拆玩一百次都唔厭, 啲書除左睇完又睇外仲同細佬玩埋圖書館館理員. 我好感激媽咪係有意無意間幫我培養興趣, 雖然我而家唔係做咩驚天地泣鬼神既工作但我肯肯地媽咪令我鍾意思考對於我而家既工作絕對有助攻! 媽咪 I LOVE YOU! 細個時候已經鍾意影死物不過媽咪晒相時發現比佢省一鑊話我嘥菲林!我dum晒地先可以保得住呢2張相! 呢副積木當年賣二百幾蚊係日本出品仲貴過Lego, 我好重視呢間豪宅每次砌完都要欣賞一大輪先拆屋!

老友有日話好耐未試過同我好似細個既時候咁星期日去行街食野，所以我地 2條友的起心肝今日要慢食hea行！ 老友搵左間小店食 all day breakfast，老老實實去過紅橋咁多次都未曾行過呢個死角位！証明香港既租金真係貴到嚇死人有心做生意既小店只能轉戰up dup場！ 由於店細坐位少係門口排隊等足一個鐘，不過我地絕對明白除左夢想食好野都需要堅持 '！較早前睇過食評話要等好耐先上菜有人仲話要等45分鐘，唔知店主係咪開始上手情況改善好快就已經有野到口。同老友慢食完就啓動下個mission「hea行」原本唸住齋行唔買野但個天總唔會令你2手fing fing返屋企，竟然比我見到心大心細想買與唔買之間既波鞋最重要係得返一千零一對個對仲要係fit我既碼，咁無理由唔夾佢返屋企！ 時間過得好快同老友食下行下又過左幾粒鐘，我好珍惜同佢獨處既時間因為我知道係短時間內佢隨時有日會同我講佢要離開香港去加拿大，所以有街去我一定同佢去爭取多啲見面時間！ Cafe Heato 海圖 別有心思營業時間表 夢想需要堅持！絕對認同！曾經我亦為自己夢想堅持3年！ 店內一角裝飾，檯上有本簿比客人寫下夢想。 食物款式貴精不貴多 All day breakfast-- 薯蓉我最欣賞又香又滑！ 惹菌吞拿魚意粉--意粉軟硬度適中，調味剛好！ Italian omelet-- 呢個奄列淨係賣相都夠吸引，藍綠色既碟配上紅黃白食物組合，豐富成個眼球！ Ice chocolate-- 杯朱古力無特別不過個拉花已令我覺得成杯野好好飲！ Mocha-- 個拉花出左事 無需炒價 點捨得唔夾你返屋企！

我敢大大聲咁講我最撚怕畫施工圖! 上至對客下至對廠施工圖 極其重要只要有野出錯都大大隻鑊, 寫少隻字標少個尺寸廠既 木工夠膽死自行更改設計款式所以每次畫施工圖都要打醒十二 分精神. 對住呢堆線一日我隻眼已經化成一條線---------------

全力扣殺大部份演員對於我黎講係零吸引力除 左鄭中基, 不過睇完絕密ng片後我竟然對呢套 戲有期待, 尋晚見有時間嗱嗱聲撲去睇又估唔 到差唔多全院滿!  又估唔到零吸引力既演員組成既廢柴同盟會產 生到化學作用, 當然我覺得林敏聰同鄭中基既 滲透作用係最大! 睇笑片如果可以令到我可以 係戲院笑到dum晒地拍晒手哈哈大笑我已經覺 得套戲係好好睇, 全力扣殺絕對令我做到以上 幾樣野! 係網上見到有啲人話呢套戲爛抄少林 足球, 屌!抄唔抄有撚所謂咩! 睇場戲都係想輕 鬆下笑下姐, 做人唔洗咁執著既幾十蚊支持下 港產片又唔洗死既!

大時代首播個年我讀緊中二, 鍾意放學去玩既 我竟然為左一套 劇晚晚準時返屋企睇劇! 重播 加埋睇碟我起碼 睇左10次! 唔係扮 晒蟹係唔同 時期睇呢套劇都有唔同領略, 不過 有一點係無 變仍 然最愛就係當孝蟹+方婷出現"未曾後悔"無 限loop!

為左實踐自己行李自己攞呢個目標無謂野我盡量唔買,不過話唔買之餘總要買野比親朋戚友高興下! 媽咪強烈要求NaRaYa袋,怕比佢插爆第一時間撲去買! 我唔明個袋有咩咁靚媽咪買完一個又一個! 媽咪另一個嗜好係儲銀包同散紙包, 6個散紙包都只係港幣二十幾蚊平都咁唔係唔買呀!當佢知道咁平後竟然話我點解唔多幾pack等佢可以送比人=-= 所有零食都係Big C同Tesco包辦! 橙色蝦條又平又好食 $1包!唔食得辣既強烈不建議買粉紅色袋紫菜,我敢講包你辣到喊! 上圖右上魷魚波腥腥地幾惹味,越食越搶口! 我媽咪另一order大包魷魚,比我個鍾意食魷魚既老友攪攪下咩款魷魚都買埋! 求其係Big C買既魷魚又幾好食喎,我老友無講錯魷魚好難會難食! 係Tesco見到咁可愛既竹蜻蜓只係$10唸唔到唔買理由! Big C貨架上已經無晒Pond's BB Powder好彩陀地老友帶我地去Tesco入貨! Oriental Princess香蕉味洗頭水同士多啤利味沐浴露隻味真心堅! 呢個袋絕對唔係我style但我敢講當我自己個袋條拉鍊壞左既時候個袋救左我3日, 呢個袋雖然只係$20但佢功能大過本身價值! 螢光色Posh袋雖然係display仲要少少殘但只係$20攞黎放姨媽巾都抵啦! 呢個Posh我心知我未必會用但係我鍾意呢個色好鬼sharp! 係秒速收檔星期四夜市買由椰殼,貝殼,蛋殼造成既碗,咩殼都齊晒係無痴蝦殼! 本來應該$70一隻但我個講價王老友一出口即刻變成$50一隻! Pocky百力滋最好味係最平既香蕉朱古力味! 散發住濃濃士多啤利味! 我最唔鍾意食 cookie  &  cream 奶味甚濃 張相影得比較衰睇落唔吸引,實情blueberry味係必食之一! 呢2條野我又係比佢個色吸引而買,又係多得講價王老友洗出一招頭也不回轉身走又令我買到平野! 買到返黎唔戴點都要影張相留念!