無聊雜碎

老老柒柒做左三十幾年人第一鑊跌傷腳....唉！正所謂條路自己揀仆街唔好喊！ 當我個波...蘿蓋拍一聲跟手凌空落地個下真係痛到想大聲鳩叫一下，但我忍住無叫只係輕輕同自己講左句好痛，隔離剛剛有路過眼尾都唔望下我既Abe，回過神黎我望下隻腳咩環境有無骨插左出黎，屌吖睇落好似無咩事喎！係邊到跌低就係邊到起身，不過世事又點會咁理想吖起身先知大鑊因為起唔到身，我拖住隻腳爬去就近既sofa扶住先攪得掂，個天要考鳩你能耐既時候有事身邊唔會有扶你總要用下腦唸解決辦法，最終要急call細佬扶我去睇人生第一次既跌打。 雖然已經睇左4次而且距離事發一星期但係未完全好返，破財又受傷呢鋪蝕到應呀仆街！

從前有個好乖小女孩W係小學四年班加入左排球隊認識左小女孩K，認識K後完完全全激活W曳既潛能！ 愛自那天遇上！由認識開始除左有1，2次大吵嘴外感情只有增無減，一齊食煙、飲酒、踩roller、打交、講事非，同哭同笑同講心事到而家已經28年！有一個可以毫無保留講心底話既知心友係身邊28年好唔簡單亦好幸福好幸運！ 世事就係估唔到先出現戲劇性，幾年前K竟然話申請左移民加拿大，聽到之後心跳加速眼淚狂湧外腦海一片空白都唔知講乜撚野好！呢幾年每唸起唔知幾時要分手眼淚就失控，要黎既點擋都擋唔住我地既分手日就係今年7月4日！ K由幾年前開始唔攪生日不過上年可以話最後一次同K慶祝，所以除左人在野個鑊野外仲整左11月之星飯局。飯局期間K突然要同我飲杯跟手fing鳩左袋野出黎話送比我，天啊！點可能sweet到咁呀！連我老公都唔會比驚喜我，係你呀無謂K總係比驚喜我我唔愛你愛邊個呀！上一次送左介子比我我哭；今次送銀包比我我一樣哭！其實我在意唔係物品既價值係K比驚喜既方式同心意！ 人生第一個Chanel！自己都唔捨得買，多謝你呀無謂K！ K話之前同我傾電話時有意無意問過我鍾意長款定短款，日日傾電話講過咁多野我都無印象答過佢呢個問題。佢話買唔到短款比我長款都照殺，其實你送咩比我我都咁撚鍾意架啦！ K最憎人用散銀包，每次見到我個散銀包都瓜瓜叫！銀包內有埋散銀位好撚方便呀！個散銀包我應承你dum鳩左佢！ K叫我dum鳩左個舊銀包，其實你知我咁鍾意儲有紀念既野我又點會捨得dum呢個18歲時第一次出糧買既銀包呢！佢跟左我18年風雨同路我必須要好好保存！

同細佬係細個既時候講好多鳩話，來來去去都係話大個我地要乜乜乜...其中就係我地要睇MJ同Madonna演唱會！可惜MJ瓜鳩左最後既演唱會雖然係同細佬一齊睇，不過就係入戲院睇MJ演唱會！ 難得娜姐係香港開演唱會梗係死命撲飛啦，可惜左撲右撲都攪唔掂正當失望之際竟然加場而且比細佬買到飛，雖然只買到老連咁遠既飛但係可以入到場已經鳩咁興奮！ 頭場娜姐遲左2粒鐘先開show，所以就算8點幾仲係得好少人入場。其實外國show最正係有暖場DJ炒慶個場，上次睇Lady GaGa坐得前燈光射到就似去左party咁未開場已經跳到出晒汗，今次老連咁遠燈光唔到位投入感就少左。 爆完咪話10分鐘後開show突然播起首歌，我頂吖竟然係MJ既Wanna be startin something，完場就係播MJ既Smooth criminal!我估唔到，我真係估唔到！ 嗱嗱嗱終於黎料啦娜姐未見我地已經出盡奶力尖叫！ 娜姐出現啦雖然只係睇粒米咁大娜姐但叫爆是必須啦！娜姐唱Iconic出場堅型呀大嫂！ 大約3首歌之後在場工作人員竟然叫我地坐低話阻住後面睇，喂係咪有病呀睇娜姐show坐低？娜姐會屌到我地企返起身架喎， 最終我地係自己決定企返係到 ！ 嗱！我都話娜姐會屌架啦，問幾次點先可以整慶我地，我地山頂既好落力比反應架可能山下近台既人有頭有面比較含蓄啦，遞咪唱歌交唔到反應連娜姐問咩係rebel heart都靜撚左3秒連隨竟然答love you love you！太遠睇唔到娜姐表情不過我唸係吐血樣！ 現場聽rebel heart再睇埋畫面既graphic正到唔可以再正！ Illuminati 淨係個歌名已經講明係光明會所以畫面一開始就有all seeing eye。dancers 企係支野上面fing來fing去唔知想表達咩，不過都唔重要我淨係覺得好撚勁好好睇！ 我又要講多一次雖然我只係睇粒米咁大既娜姐，能夠睇到自己鍾意加世界第一既super star現場演出已經無憾啦！