DIY 木板凳
期待左好耐既入榫木板凳製作班終於上堂啦, 我地四條友8年前畢業後就無再係workshop一齊攪下野咁, 難得搵到個地方近屋企又可以攪下野堅係好爽皮! 介紹返間野係叫 Fishy Craft 地點係屯門震環路好收成工業大廈10樓A, 而教我地既亞朱佢好有心機循循善誘, 莘莘學子, 循序漸進.....(下刪一萬字三千六百五十字)咁教我地!而且間workshop loft style好有屋企feel好舒服! 開波啦喂! 亞朱已準備好一塊已開窿既木板, 4隻腳同2條鐵枝比我地. 我地要做既野主要要係4腳畫上入榫位及手動切割, 組裝,打磨及上色咁就完成架啦. 先用已準備好斜10度既木殼套上木腳畫出要鋸既位置, 一向追求精準既我係呢個step已經落後. 一開始就落後加上我老友小熊維尼隻出色磨打手佢幫我鋸埋2隻腳都仲有時間幫我影making of, 你話呀以前同佢一齊做group project既我幾寫意呀! 鑿下批下條賓周仔就出左黎! 好嗱4條木腳終於攪掂!開始進入組裝程序! 老友Y因為攰到進入唔到狀態所以係亞朱幫拖其間佢又可以影making of! 組裝完成! 神蹟呀得我一個張凳係完全平坦唔洗鋸腳調整, 個下當堂覺得自己威威豬! 鐵枝上有唔同字母同符號可以揼上木凳. 揼完之後仲要用尖銳雕返深個字. 4粒突出既 賓周仔( 榫腳)當然需要鋸走, 要鋸得平坦鋸面必須緊貼凳面如果唔係要磨返平就會多左功夫. 唔洗講我梗係鋸到又平又滑do do啦! 終於黎到終極環節---上色! 曾經我試過買伊度巴玩下索色咁可惜係失敗收場. 我唔係咁鍾意帶紅或帶橙既木色所以揀左黑胡桃色而三個老友原本揀左檯面既色唸唸下又跟埋 黑胡桃色果然係共同進退! 亞朱話如果用叻架做coating一來大味道二來多左工序, 所以用左係ikea到買蜂蠟溝埋 伊度巴一齊索色, 上左色之後等係半乾狀態下就要用廚紙輕抹. 登! 登! 登!凳! DIY designer chair終於完成啦, 滿足感100%! 大集合!