無聊雜碎

尋日倒塔咁早返到公司唸住坐定定等10:00既來臨.......時間一到左隻手就開始瘋狂F5右手就禁電話，可惜網頁入唔到電話打唔通！係呢個咁重要既時刻係另一邊應該瘋狂F5緊既細佬電話到，我以為佢成功啦點知原來佢hang埋機問我入唔入到，正死仔阻住晒如果買到我就唔打鑼打鼓話你知咩！ 收左佢皮之後收到幫拖既朋友msg話入到個page而家有2個位要我速電，我梗係即刻馬上用0.1秒call佢啦， 朋友: 而家有$680有2個位,要唔要? 我: 要呀要呀....不過....... 朋友: 其實有8分鐘時間揀位，會random咁出，一係幫你再試下會唔有3個位. 我: 好呀！（其實我內心好爭掙扎，想無義氣唔理細佬個朋友） 收線唔夠30秒朋友msg我話佢唔要個2個位之後，比個page踢左出黎，天啊！冚家鏟想死呀！點解咁架？Madonna呀！我好想喊！ 我做左個好錯既決定， 如果唔係因為義氣我已有飛係手，同細佬齊齊去朝聖！點解呀？ 點解呀？上次Lady Gaga我已經用左$2800買一張原本$1280既飛，唔通我又要食炒價．．．． 鍾意Madonna既歌係由一首慢歌開始，小學既時候tvb有個外國節目係有一對男女去世界各地潛水介紹返唔同海域入面有咩特別，每次我都會坐定定陪爸爸睇錄影，曾經我自我幻想大個之後我都要去唔同地方潛水，可惜發生左不可逆轉事件令到我害怕左個海洋！有一集女潛水員素恩(個名我仲記得因為呢集我睇左100次以上)游近條座頭鯨再同佢暢泳而係呢個moment就播出crazy for you，畫面加埋首歌感動到喊呀！自此我愛上呢首歌我重重覆覆睇呢一集睇到盒錄影帶花晒都係為呢首歌，雖然我睇咁多次但係我仍然未知呢首歌咩名係邊個唱，以當時既科技要知確係有難度！我唯有夜晚瞓前用爸爸買比我牛津字典咁厚既walkman聽收音機，搏下會唔會播呢首歌等左好多好多個夜晚終於比我等到啦，音樂一起嗱嗱聲錄底佢可以慢慢回味.....Madonna演唱會睇唔到睇住mv頂住癮先啦！

近來又做埋啲師奶行為，有街盡量唔去，係屋企坐定定追劇！順路講下點解結左婚既女人比人叫做師奶?咁點解結左婚既男人唔叫師叔、師伯、師公或者師爺呢？挑！唔好同我講呢個問題又係土地問題呀！ 撒旦回歸返返正題，近來追緊既劇正是"陪著你走"開頭追既原因當然係因為隻導盲犬細導生啦，不過睇左頭2集大撚鑊我竟然頂唔順陳豪衝鋒車式既說話方式，正當想放棄之際麥包同陳豪條朋友線起圍，正正呢條線留住左我而且越睇越有味道，成日講既"情懷"真係觸動到我既情懷因為我都有一齊成長既朋友走過80、90、千禧年代情懷多到嘔，簡單如一杯7-11思樂冰， 扭紋軟雪糕或者雙響炮都足以講足一晚..... 陪著你走 如果我鐘意一樣野我會尋根究底，所以就撲上網搵呢套劇資料，原來陪著你走既監製就係愛我請留言既 監製愛我請留言既監 製就係師父明白了既 監製！頂！一早講啦！ 不過TVB好似唔興講套劇係由邊個邊個精心打造，一路都係只提演員不提幕後，其實無幕後何來有幕前！ 愛我請留言開頭除左劍雄同翠如bb吸引我外零零狗都係主因黎架！呢套劇真心無得頂初初聽套劇既名真係以為係鳩劇，呢套劇除左劇本同演員好之外每一集仲有幾首陪住我地成長 有 情懷既歌穿梭，咁既款仲邊有得輸呀！淨係關禮傑個句口頭蟬"golden water give you power"已經令我入晒腦啦！ 以前又係因為個名而令我無認認真真睇過"師父明白了"！前幾日終於用左3日時間煲埋呢套劇，當好認真睇既時候就發現套劇有meaning有message。我有理由相信我淚線極度發達每當劇入面響起''化蝶''我啲眼淚就好似豹突泉咁狂噴而出，結局唔洗講梁山伯就哭墳我就哭劇！ 劇入面麥包有句說話好正''協埋對眼爭返開一日過，協埋對眼爭唔開一世過''同埋劍雄個句''只要你好想好想，只要你好信好信，個天一定幫你''做人信念堅揪緊要，無信念難關一定難過！ 我強烈要求無記如果有新劇出既時候不妨考慮宣傳時好似電影咁提提係邊個導演，邊個監製繼邊套劇後精心打造既新劇，咁起碼防止流失左好似我呢批睇劇名先決定睇唔睇套劇人。多一點尊重多一點觀眾！ 師父明白了

生日月份飯局特別多為免肚滿腸肥身驅加重負擔最好就將次數濃縮，感激各好友既飯局！ 黎到最後一激就係同小學雞既8月之星飯局，老友推介既位於元朗雞地既敘亨軒，雖然地點唔太就腳但係呢間野真係掂！由於我地夠最低消費$2000所以有房比我地嘈嘈閉。呢餐飯真係好滿足美中不足既地方係個醉雞窩越食越苦，苦既程度令到我唔想食打邊爐既野，好彩既係仲有個胡椒豬肚窩補位。 我本身唔太愛龍蝦刺身，不過呢盤波士頓龍蝦刺身擺盤精美顏色豐富攪到我忍唔住手！刺身食完之後再攞去芝士龍蝦可惜芝士味欠奉。 花竹蝦刺身堅揪無得頂，鮮甜到不得了！蝦頭蝦尾再攞去炸，炸到脆卜卜咁岩我食個個頭充滿蝦膏堅想大叫"好好味呀" 我一向唔食魚生所以呢條不知名既魚生既時候好唔好食就唔知，不過我就淥左幾片食熟食都唔錯。 老友淥左條聖子王分左半條比我，老友掌握個時間好好令到聖子王又爽又甜。 嗱我就唔食牛肉既所以唔知好唔好食，不過我相信都唔差得去邊，因為除左上檯個一下見過呢碟之外，好快連隻碟都唔見左。 全景圖 老友好有心飛澳洲時帶左支澳洲版Moët 返黎，呢支比起綠色版更岩我口味！ 今年生日我只係切左2次蛋糕，2次都係同一個老友買，2次佢都係為左買蛋糕而厄我話有野攪要我自己搭車去目的地，當我見到個蛋糕時我真係有衝動撲過去擁吻佢，不過我知佢最怕係咁，所以在心中啦！