長洲搏命食食食

已經有成7年無去過長洲，難得癲雞仔吹雞入長洲宿營老虎蟹都衝住入，冒住比老細殺頭都要早閃去玩！

7點埋洲太陽落山所以無咁熱，同一樣係長洲玩既細佬影張大合照後就嗱嗱聲去渡假屋check in。7年前同班朋友去宿營間屋又嗅又污糟，今次我地book呢間B & B又企理又乾淨絕對無令我地失望！拋低細軟就隆隆聲殺出碼頭展開搵食之旅，經過一致投票決定食碼頭附近一間泰印菜Morocco's開餐！意想不到呢間野真係掂由其是個冬陰功，由於忙住食野無咩點影相。

原本點泰式青咖哩不過侍應話我地知辣到飛起建議我地食印度咖哩雞，果然無介紹錯好很正！

扎肉沙律係我地點既野最辣既一樣，基本上要食晒係mission impossible，最終老友發現扎肉點咖哩汁無咁辣，就係咁我地淨係食晒扎肉同青瓜。

食完餐飯4條友就漫步長洲策劃一下消夜食啲乜，老友見到檔生菜魚肉lam晒咀堅持要整返碗返屋食，而我又想食兩溝可惜佢個煩撚咀又唔食兩溝，終極各一碗返屋溝4人分！係屋攤屍攤到十二點又片出碼頭搵食，消夜檔係呢個時候百花齊放，好耐未見過呢個場口。

同老友首先比呢個串燒檔吸引，一人一條腸！可惜條腸唔太好食起硬邊！

呢檔炸野食認真無敵，生雞脾雞翼攤晒係到即係話所野即場生炸，而家無乜幾可有生炸脾翼食。

煎釀三寶$10 8件絕對超值至於味道當然粉既比例多過魚肉啦。

企正係檔口睇姐姐生炸脾翼，我既汗多過炸野既姐姐，真心熱到喊！

第二朝十二點半check out完又開波繼續搵食，第一站故鄉俱樂部紅豆餅，由於有老友已經食過所以買一件3人共享。

已經唔記得個皮係咩味道同質感，淨係記得紅豆好香甜味適中，如果唔係要留肚食第二啲野我絕對想覆卓整多件。

跟住落黎就食洲啤工房巨薯棒，由自己調味其實有種花多眼亂感覺，因為唔知邊種味好同埋要落幾多份量。基本上我地沿路邊行邊食路邊婆婆雞屎滕、新鮮菠蘿冰、甘永泰大大粒魚蛋、白魚蛋、蝦丸、墨魚丸....雖然所有野都係買少份量4人分但係已經有飽感。

天氣熱得太淒涼身為冷氣狗一份子我條底褲濕完又乾乾完又濕，總之全身都榨得出汗！我地決定搵間甜品店坐低歎下冷氣食返啲凍野降一降溫，話雖我咁怕熱但係我又唔怕行喎！左行右行見到間天然甜品竟然價錢咁公道，我地梗係殺入去探路，我地一人一碗豆腐花拼乜乜乜 再另叫榴連布甸，絕無令我地失望！

我用左殺手鐧「有今生無來世」說服到煩撚咀老友食芒果糯米糍，佢竟然咬左2啖仔之後生吞左@@我認輸了！

食左2日榴連芒果糯米糍我覺得每間分別不大，基本上都係正到無朋友！

終於黎到最後一擊康蘭餅店，老友話必須要食蛋撻椰撻！我地企係檔口側邊食完一次再補貨食到無散紙為止，平均每人都食左3，4粒，回味無窮！

$2 一粒細細粒 個牛油皮的確做得好鬆化蛋亦滑，回味無窮！

椰撻表現同樣出色！

我地呢個食食食mission由一杯大家童年最愛7-11思樂冰為結束。

長洲今時唔同往日如果要食盡美食麻煩帶個黑洞胃入去，否則必定飲恨！

是咁的有個亞姐帶住個仔係我身邊行過而當時我正身處於情人鎖牆旁，佢對住個仔拋下一句令我當堂想跪地一拜既說話：情人鎖（冷哼一聲）要走既鎖都鎖唔住！

亞姐今日你最型，世事都比你看透！