大雞唔食細米布吉之旅講玩講笑篇之一

12月 14, 2016

黎到布吉又點可以齋食唔玩架! 6日5夜基本上係唔夠玩因為都有好多野未玩過, 不過唔怕只要布吉老友一日駐紮係布吉我地都會keep住去既!

介紹返: 我個布吉老友其實係專業潛水教練, 有個同聲同氣講廣東話(普通話都得)教潛水領略都會好d起碼唔會有誤會ma!另外,佢仲會幫人租車租船去到布吉已經可以直接玩幾咁疏乎!

Facebook Page 遊走布吉

https://www.facebook.com/playinphuket/

揀villa識揀一定揀有泳池!凸字形泳池好鬼配合我平時凸凸手勢hehehe....

等緊大少們起身我地影下相打發下時間, 呢個位置係villa入大廳門口位,紅色加上銅色圓形裝飾完全係中式style.

飲飽食醉就搵到地方揼爆骨!雖然我唔係好鍾意揼骨每一次我都叫到拆天猶記得同班八婆姐妹係台北揼骨我同另一姐妹叫到骨姐都慌失失.
不過一班人行動唔鍾意都要頂硬上,最多咪只做腳底按摩. 布吉按摩店有d好似舊式髮廊咁有d就有裝修但係價錢幾乎一樣, 咁梗係揀有裝修既觀感同實際都舒服d啦!
原本我地係揀呢間按摩店可惜佢話我地太多人無咁多骨姐招呼我地.

行前幾步就見到呢間Kim's massage & spa 最重要有足夠骨姐. 我同3個老友揀腳底按摩其他人就玩全身, 腳底按摩一個鐘連埋貼士都只係港幣$100.

臨出發前拉叔千叮萬囑我點唔鍾意都好一定要試泰式按摩仲話送我2個鐘! 我只可以講試過泰式按摩真係返唔到轉頭舒服到不得了!而且幫我按摩骨姐雖然鍾意兩頭望但絕對唔係hea做, 呢d咁辛苦既工作又做得好身為客人比貼士比得舒服! 泰國又多一樣野令我愛上啦!

連個天都鍾意我地呀yeah!yeah!yeah! 日日落雨一到出海日就放晴藍天白雲 I like it!

呢隻船我地係自己包一隻玩連埋船家煮午餐,如無記錯係19,000bht 一班人有私人空間玩爽好多! 今次潛水點同上次一樣係皇帝島, 上次我同水面游既魚影左好多沙龍所以今次就算好多魚都唔影因為我打算落去同佢玩遊戲......

我同2個老友就無玩潛水其他人就跟布吉老友落晒去玩, 有潛水牌既老友可以自己游, 體驗潛水既就要由布吉老友帶住啦!

海底既世界真係好靚!唔知幾時我先可以衝破障礙親身去感受.

潛水老友玩完上水, 係佢地潛水期間我唔知邊到黎咁大勇氣同我老友"地球毀滅者"跳左落海游水當然著晒救生衣同帶埋浮條. 我同"地球毀滅者"由6歲就認識隨住年紀越大毀滅性越大, 比佢掂過既人同物件百分之九十出事, 平時聚會為左保持住我地之間既友情我盡量唔坐佢隔離, 今次孖住佢係個海到玩浮潛我內心不知幾誠惶誠恐! 海入面好多水母我同"地球毀滅者"起勢左閃右避, 船家同我地講唔怕架最多炸一下少少痛!鬼唔知咩就係連少少痛都唔想麻.

原本搶灘唸住係沙灘玩下影下相, 點知一個細細既沙灘塞滿晒人仲要係好多大媽!!!我地恐怕佢地會係沙灘跳廣場舞曾經黎過呢個沙灘老友提議去另一邊沙灘, 當我地商量緊既時候就有班的士佬向我地兜搭話行過去好遠叫我地坐的士去, 我心唸"邊有錢呀,你老母!" 點知老友突然爆出佢有帶錢, 我地就123跳上呢架所謂既的士. 呢架的士危險度十足除左坐係司機後面係真係坐係架車到, 我地3個只係坐係到有轆既鐵框唔扶住既話有拋出車既可能性, 不過正正因為咁先覺得好好玩由其是落斜過癮到暈!