紋身第一擊

十幾歲既時候有班朋友約埋齊齊去紋身，由於當年淆底獸上身怕痛加上班朋友一致通過齊齊紋翠兒或者米奇老鼠上身，我聽到就更加淆上淆！大佬呀咁kawaii既點配係我身上呀！我仲唔嗱嗱淋出九千個藉口閃退呀！

由於工作及各方面既關係又將紋身呢件事放埋左一邊，直至3年前妹妹去左彩虹橋.....咁岩又睇到Miami ink、L.A ink等等真人show節目了解多左紋身既野，加上一年前第一老友出現第一個紋身就泛起我既漣漪！

痛唔痛已經唔係我考慮因素首先要做既係要說服老細批准我咁做，事關紋係當眼位置見客一定有障礙。起初老細都唔係咁接受但係一年入面我用誠懇感化佢同佢講其實而家紋身再唔係爛仔專利而係一門藝術，而且我要將我最愛妹妹紋係手上佢再搵唔到say no理由！

人生行到呢個位已經做左2條好漢，既然綠燈已開就無野好怕唔好理其他人點唸嗱嗱淋去馬是必須的！係呢件事入面多謝幾位老友支持同幫助，大恩不言續個謝。

師傅先係張圖上畫出outline再印個稿上手。

以前上drawing，painting堂既時候tutor成日提住隻眼一畫得唔好成幅畫可以收皮！呢句說話我入晒血入晒骨！

所以當見到個outline時我嚇左一跳，點解...點解妹妹由bling bling眼變左豆豉眼既？始終紋身係一世雖然我唔想做煩膠但為免出黎效果同現實有出入，我鼓起勇氣問一問shop manager，點解唔係直接問師傅？咪就係因為師傅係台灣人囉，好明顯我聽同講普通話都係弱雞之星啦！但其實師傅講解左完都未完全釋除我疑慮始終我仍然見到2粒豆豉！

師傅知道我係第一次係紋之前已經講明如果覺得痛就要出聲叫停千祈咪郁來郁去。

唔知係我肥大肉厚定係師傅技術高超，當第一下落針時唔係太痛感覺幾過癮，去到某啲位置比較痛啲肉好似地震咁我就同自己講點痛都唔及妹妹離開個時痛再望住妹妹張相自自然然就頂得到！

好多時我都係望住師傅紋因為睇得紋身節目多唔太怕聽到機器發出吱吱聲同埋望住針刺落肉，只係有時望得太耐本能反應連自己都震埋既時候就要停止再望。我唔痛唔叫停師傅都要抖抖大約30-40分鐘師傅都會比個break time大家。

經過2個半鐘頭終於完成，我之前擔心既野真係多舊魚！望住幅作品堅感動唔係怕尷尬個刻堅想喊，好想攬一攬師傅講多謝(師傅係cool man最終唔敢做)妹妹係師傅手下活靈活現，完全做到成個神韻出黎。以後我可以抱住妹妹係手永遠與我同在！

隔左3，4日就開始甩皮，由於朝早撲住出門口所以隻手先咁乾，茶返lotion之後甩皮情況無咁明顯純粹痕囉！

一星期差唔多甩晒皮睇下妹妹幾靚女！

再次感激13ink Tattoo & Clothing Macau既Master Chino!