台北食玩hea Day1

次次都撇甩老公自己去玩今次終於有老友幫拖湊我家既老婆婆Abe，趁住老公生日走返轉台北賀一賀佢！

頂佢個肺倒屎咁早起左身收到國泰delay msg！可惜已經早一日已call的費事改時間唯有早啲殺入機場hea下食下野，好彩都係delay半粒鐘！

Captain Cool起飛....天氣好可以睇到好靚既雲，UFO你在那兒？

未搭過國泰去台北估唔到個飛機餐咁弱雞，中華航空起碼都有粒鳳梨酥食下！

食完呢個雞肉卷突然之間睡意到瞓到暈左爭在未流口水。

為左方便食今次揀左住西門町西寧南路薆悅酒店。

唔好以為早機去去到係夜晚只係夜晚落街搵食時補返張酒店外型相。

酒店大堂

大堂另一方向，其實大堂唔係大可以係叫細堂，不過精品酒店係咁上下。

3日之後大堂呢部Mac機救我一命！

好奇怪點解有Boo出現，除左呢個地方外我再搵唔到酒店內有其他野同Boo有關。

上到房第一時間片入浴室睇下咩環境，因為廁所真係好重要！

每日都會refill一套新既L'occitane洗頭水、沐浴露、body lotion、牛奶皂。

我住呢款房浴室係無門自出自入，不過坐廁同企缸位出面就望唔到，全浴室衛浴設備都係用TOTO，廁板同樣有洗pat pat function。

5尺床夠晒2個人碌。我天生係冷氣狗夏天要開大冷氣先瞓到，但係呢間酒店既冷氣好虛弱連老公都話冚住張被係會熱醒，所以我幾晚都係無冚被先攪得掂！

放低行李都差唔多4:00嗱嗱聲搭捷運去Sogo復興店鼎泰豐食蟹粉小籠包，滿心期待終於到......

一口咬落去，um....點解差左既！好失望！入面湯汁唔夠多肉質比較乾蟹粉虛弱！

已經無期待所以呢個煎餃（好似係鮮蝦）叫做填飽個肚餓我唔死就算！

第一老友特別要求買呢個magical puff，佢開到口就算來回地獄又折返人間拼左條命都買比佢啦，由Sogo行去頂好名店城大約10分鐘，唔好見個商場好似好把炮咁其實個商場up dup到不得了又熱到喊連間舖入面都要開風扇！

講返呢個Puff老友睇雜誌介紹話化妝後可用呢個puff既特製布吸面油，雜誌登個價錢係$95港元，原本唸住同佢一人一個點知唸住比錢既時候我發現無價錢牌一問之下話要$150港元，我自我覺得唔太老實所以買比老友算吧，自己個個吹簫吧啦！

鏡頭一轉又返返西門町搵食，點少得整返碗亞宗麵線，老公見有走鬼檔又篤返串魚蛋，正想買返串台灣腸既時候突然聽到''來啦，來啦''擔煙腸佬boom boom聲推車絕塵而去。頂！原來走鬼，屌那星食條陀地腸都咁難！

係西門町流浪到戲院門口見到Ironman梗係撲埋去影張相啦！

大隻版一樣咁有霸氣。

無論任何時候西門町都係咁多人，無論係邊個位置影相總有一個人係你左近，唔講以為係同佢合照緊。

既然行到黎西門紅樓總要入去行個圈睇下展覽涼下冷氣，唔知台灣係咪實行緊環保政策去到邊都唔夠冷氣熱到出汗，我目測過如果展館有四部分體機只會開一部，留意返當日台北都有三十幾度！

西門紅樓外有創意市集我心底裡好支持自家設計作品，但係身底裡熱到底褲都濕！無左耐性插入攤檔慢慢睇所以匆匆睇過就算。

由於天氣太熱麻辣火鍋、燒肉通通食唔落，係西門町求其上左間我連名都無望清楚既自助烏冬店食，上去既時候係得小貓幾隻幾想入後波走人不過本住好又一餐唔好又一餐既精神照食可也，好彩呢間野又唔錯喎，烏冬彈牙炸蝦火喉又剛好湯底清甜，而且坐底無耐間野又full晒。

返到酒店沖完個靚涼突然口痕就巢係小林煎餅到買既um..我唸係曲奇又可能唔係曲奇總之有cream既餅黎食，頂吖又幾好食喎!

幫我湊狗老友指明要我買一支Latte同奶茶，佢咁強烈既要求我當然不甘後人係7-11買返支試下咩料啦，我無飲開咖啡奶茶習慣（本身飲開阿華田、朱古力）呢支野堅揪掂呀！我往後幾日試埋奶茶、炭燒咖啡同樣出色！

點解我會夜晚先黎試飲咖啡？係咪唔打算瞓？好明顯我飲既時候無唸過飲完瞓唔著証明我真係門外漢！