台北食玩hea Day2
今日係老公生日台北天氣好鬼晴，藍天白雲雖然都係熱但有陣陣涼風感覺舒適。今日係星期日為免去人多景點所以安排左全日食、keep住食、繼續食.....
是咁的當日睇住Google map由微熱山丘行過黎大約5分鐘到啦，望住個map明明間寵物餐廳係呢到點解唔見既？我地企左係到無奈左5分鐘左望右望，頂頂頂！原來間野就係對面馬路加上我地行前左十步角度比樹遮住左招牌。
Order左個雜錦海鮮盤隨盤跟沙律，老規矩老公食魚生我食菜。
見到人食又忍唔住order左2隻牡丹蝦。隔離檯連蝦頭都吸埋食得津津有味，老老實實生蝦頭堅唔敢吸！
如果平時我已經單手撲飛搶隻大生蠔食，見老公生日就讓隻大生蠔比佢啦！
前一晚已經睇過胡老師表演噴畫，佢噴畫時份氣派好吸引人，原本打算走前一晚先買畫，但係唸唸下心動不如行動即時買左張，好彩做左個明智決定之後幾晚胡老師無係西門町表演。
第一站就黎到迪化街，有歷史既建築零舍迷人就好似帶你走入時光隧道，上次同班八婆黎江記華隆買豬肉紙已經留左深刻印象。
開餐目的地：稻舍URS329 大同區迪化街一段329號
間屋既歷史唔多講總之就係二進磚屋主要物料磚同木，將一間舊屋活化成餐廳同展覽真心佩服台灣人保育工作。
一入門口騎樓底位置有幅壁畫，我有理由相信係昔日迪化街景象。
二樓位置有畫完畫既痕跡。
人黎呀！我都想畫呀！
嘩嘩嘩！絲印網呀！好懷念呀！
仍然記得當年讀design時老趙教我地點樣一手一腳由整個網、印模板、成品整個過程，正正因為老趙教書笑爆嘴所以佢教既每樣野我都印象深刻。
簡單既menu款式唔多，好食既野一樣就夠。
等左半個鐘終於有野食，左邊係魷魚螺肉蒜燉飯，右邊係菜脯雞燉飯，未放入口淨係香味已經引死人，味道更加不得了同risotto有d似不過米係全熟既，呢款中式risotto超級大愛呀！唔好睇佢個造型似為好細碗，其實份量都唔少。
當日咖啡機壞左（對於我黎講唔重要，老公大鑊啲）所以order左2杯黑糖鳳梨愛玉。
食飽飽就漫遊迪化街，呢條街見得最多係海味店。
仿巴洛克時期既建築，立面既浮雕唔講得少。
由街尾行到街頭就係想去frog cafe，唔係飲咖啡係買木製品。
上：3D打印磁石（左象右羊）
中：夢想 於漆黑裡仍然鏗鏘....
下：木製印章
細佬話想微熱山丘鳳梨酥雖然我都未食過，一試之下覺得其他傳統牌子比較岩我口味，唔理咁多啦照係呢到入貨做手信啦可能我自己妹仔嘴呢！
小春日和動物雜貨珈琲
地址：松山區延壽街361號
黎到無理由齋坐既整返杯mocha先。
介紹返圖入面2隻貓貓同有著底褲仔既狗先係小春日和既店長，其他既狗狗係其他店既店長，小春日和除左幾隻店長外加埋其他客帶狗狗黎熱鬧到不得了，當然我隻手亦都忙到不得了，咁多貓狗係到點認得住隻手唔摸呀！
老公話要返酒店放低手信休息一下，我趁呢個時間單支落街睇化妝品，睇呢啲野有男人係到始終都係阻手阻腳！
根據blogger講Sofina Primavista Ange持久控油底霜係must buy item！既然唔洗$100支唔好理多買3支看下門口！
老公最期待既地方因為佢係海鮮乜乜乜，去到邊都要食海鮮！
6點鐘黎到上引水產已經人山人海，我地完全無頭緒根本唔知點買點煮，而且望見比錢人龍已經淆底，唯有一路向前行去到最深處見有得攞飛等位梗係攞左先啦，一心以為張飛係攞燒烤區既位咁咪又錯囉！原來係立吞區既刺身位！老公話唔好理咁多食左先，跟住再食燒烤！
鮑魚、飛魚籽、烏魚子、蟹腳樣樣我都有食除左魚生同扇貝，唔可以話去到頂級好食不過就對不過不失對得住個價錢。
唔知係咪呢盤野有野唔乾淨當晚老公痾左3次！
立吞完又撲出去備長炭燒烤區等位，好彩要等位可以比我個肚緩衝一下。
唸住可以邊食邊聽歌點知等位既時候佢已經唱完。。。
侍應放好陶板爐後就要等另一個侍應帶我地出去揀海鮮同埋燒烤既食物。
陶板爐只係熱住燒烤好既食物唔係自己燒烤。
是咁的後來坐我地檯黎左一班香港人，有個男人同我一樣用古天樂式普通話，佢舉起隻手大叫「阿靚濟」，對唔住我真係認唔住笑左出黎....我相信個男侍應並唔係聽到個男人叫佢而係見到個男人舉手。
燒烤區既食物燒得唔錯，鹽燒大明蝦燒到火喉剛好肉質鮮甜。
安格斯牛小排、南非小鮑魚、秋刀魚鹽燒、生薑燒波特菇、活菌松阪豬肉串燒、仿土雞肉串燒 食完呢堆野真係飽到上心口！
近近地去饒河街夜市行返轉，雖然飽到上心口但係想搵返個情懷忍唔住排隊買左胡椒餅食，老公唔食我一個人硬對，由街尾食到街頭都未食完最終都要放棄。
唔好問點解買呢張畫因為無原因純粹覺得靚同順眼。
胡老師會係畫背簽名。
留言
張貼留言