台北食玩hea Day3

由於今日要碌長途車所以趕係10:00前歎返個酒店送既免費早餐填一填肚。

第一站新北投天玥泉溫泉館（捷運新北投站落車行5分鐘到，超方便）

閒日NT1150 (90分鐘 2人）冷熱池各一

我好鐘意浸溫泉浸完成個人有煥然一新感覺，爽爽豬呀！

介紹返白磺泉酸鹼值約PH4-5，泉溫約42-45度，無刺鼻硫磺味。

重點黎啦：有止癢、解毒、排毒的效能。對於皮膚病、動脈硬化、風濕症具有療效。

濕完熱跳去凍水池凍到我郁都唔敢郁淨係隻腳掂凍水，但係老公一盤凍水潑落我身我當堂慘叫一聲，隔離房聽到咁淒慘唔知以為有命案！

好怕搭台北公車感覺好亂唔知有無車站顯示唔知點落車，不過原來我顧慮係多舊魚，除左上車要問幾錢外車內係有車站提示，而且如果鐵定要去個個地方無論幾艱難都一定唸辦法去到為止。

三芝天氣正呀喂！強勁既風吹到我頭到癲！原計劃浸完溫泉會gel返好個頭點知溫泉會館個風筒真係十個叻，㩒一下先出一下弱雞風咁既款點吹呀大嫂！估一百次都唔會估到咁modern既溫泉會館會有個文藝復興時代既風筒！算，我放棄披面就披面啦！

伊亞藝術咖啡館

地址：新北市三芝區後厝里北勢子12-1號

搭捷運淡水站落車行2分鐘到公車站(公車站有間康是美係到)，搭860、861公車(可能有其他號碼車) NT30 一位，後厝站跳車(大約20-30分鐘，視乎司機手車)，落車後向前行幾分鐘對面馬路有老連咁大寫住"草泥馬"，咁呢到就係啦！

一坐底店長草泥馬Snow就行埋黎打個招呼果然夠親民，由於係平日而且差唔多3:00店內人唔多，可以自由係店內任何地方追住Snow影相。

我敢講Snow個身香過我屋企隻狗而且啲毛滑到不得了，無論我點樣攬住佢影相佢好少反抗同佢自拍時又識得望鏡頭，可愛程度爆爛100盞燈！

呢個小妹妹係我競爭對手，佢長期係Snow身邊，我要等佢走左先有機會同Snow單獨相處。

Snow有個古怪癖好就係鍾意咬扣，鐵扣、膠扣一律照殺！呢張bb櫈既扣係佢至愛，可能佢牙仔痕。

除左係店內Snow，店外仲有6隻草泥馬(希望我無數錯)不過味道就大好多而且有圍欄只可以隔住欄餵佢地食紅蘿蔔，紅蘿蔔店內免費提供。

由於係閒日所以可以向店員要求上2樓同幾隻豹貓玩，呢隻貓bb見到個玩具2眼發光用佢強勁彈跳力追殺個玩具。

2樓差唔多面積都係呢個大鐵籠貓貓係裡面可以自由活動。

呢隻仔仔好有霸氣我係籠入面咁耐佢都定過台油，佢既霸氣令我有啲淆底我問過店員先敢摸佢。

呢隻貓貓一直都係最高點無機會親近。

咪以為間餐廳淨係用草泥馬，食物質素都唔差，拼盤份量充足食左幾條薯條先影既，充足到2個人食唔晒。

蕃茄海鮮意大利麵又係食左幾啖先影，原本上檯時隻碟係乾淨企理。碟意粉好岩我口味我食到一條不漏。

依依不捨離開餐廳向返後方向行黎到淺水灣吹吹海風，為怕對鞋入晒沙我地無行落沙灘只係岸邊散下步影下相。

同東尼明哥係佛朗明哥等公車返淡水。

我隻手唔易拖一拖就要拖一世hahaha!

五點半就已經日落。等我留住個日落係我指間先！

淡水日落每次睇咁magic!

短短半粒鐘就要同太陽伯伯講聲sayonara！

淡水竟然有土耳其雪糕，有得玩有得食又點少得我個份架！

回程順路去士林夜市是必須的！我個肚最怕遇到天氣熱，一熱我就食唔落野係士林咁多野食但係偏偏食唔落。

士林地下街第一次行。

空肚而回係無可能架，為重拾同老友當年情懷整返碗十全排骨同魯肉飯，雖然身邊老友變老公但係情況係一樣，2條友都係食極少跟手就睇住我食，係咪咁抗拒呀？好野黎個噃！

又係返到酒店沖乾淨涼先肚餓，好彩前一日係老天祿上定貨！係屋企discovery, AXN黎到台北又係睇呢2個台，真係想一隻鴨翼夾爆你！

我好少無端端自隊成件事都係迫於無奈，點解咁講？因為由第一晚開始就開始聽到末日號角！！點解鼻鼾聲可以咁利害架，起勢追住我隻耳黎chur！你既鼻鼾聲就係我既末日無一晚係可以瞓得安詳！不過我又錯酒唔夠多唔足以自暈所以即晚又聽到末日號角響起！